သံစုံများနဲ့ ကျွန်တော်တို့ရပ်ကွက် (ရပ်ကွက်ထဲမှာဗျာ-၂)

မိန်းမအလွန်ချစ်သူ (၁)
'မအေ**... ငါ့အိမ်မှာ ငါအော်တာ ဘယ်သူ့ သောက်ဂရုစိုက်ရမှာတုန်း'
အေးချမ်းငြိမ်သက်နေတဲ့ ညအခါသမယကို အထက်ပါ သံစဉ်ကြီးက ဖျက်ဆီးလိုက်ပါတယ်။
'ငါ့မိန်းမ ငါပဲ ဆဲမယ်၊ ဘယ်သူမှ ဆဲစရာမလိုဘူး ... '
ရော်... ခက်တော့ ခက်နေပြီ။ ဘယ်သူကများဆဲလို့ မကျေမနပ်ဖြစ်နေလဲ မသိဘူး။
'သောက်ကောင်မ... ဟင်း... ကတုံးမ... နင့်ကိုငါယူတာ ကံကောင်းတယ် မှတ်'
ဘယ့်နှယ်.. သူ့မိန်းမ ဘယ်တုန်းက ကတုံးတုံးလိုက်ပါလိမ့်။ ညနေစောင်းကြီးကပဲ ရေမိုးချိုးပြီးစ ဖြီးလိမ်းပြင်ဆင်လို့ပဲ သူ့ဆိုင် မီးခြစ်သွားဝယ်တုန်း တွေ့လိုက်ပါသေးတယ်။
'*သယ်မ.. အလကားပေးလို့တောင် ဘယ်သူမှမကြိုက်တဲ့ အပျက်မ...'
အင်း... ဘယ်သူမှမကြိုက်တဲ့ဟာကြီးကိုမှ သူကကြိုက်ရှာတာကိုး... သူ့ထိုက်နဲ့သူ့ကံပ။
အဲလိုနဲ့ မြိုင်မြိုင်ဆိုင်ဆိုင်ကြီး နောင်ဂျိန်ကြလေသတည်းပေါ့။ မိန်းမက ရှေ့ကပြေး၊ ယောက်ျားက လိုက်ကလိုက်နဲ့ ကြက်မနဲ့ကြက်ဖ ချစ်တမ်းကစားတာ ကျနေတာပဲ။
'ဒီကောင်မကို သတ်မယ်... ပြန်လာရဲ .. လာကြည့်..ဟင်း ဟင်း အကြောင်းသိစေရမယ်'
အကြောင်းမသိလို့ဘဲ ယူထားကြတာလိုလို... အဲလိုနဲ့ မိနစ် ၄၅ မိနစ်စာဇာတ်လမ်းတိုလေး တစ်စခန်းရပ်ခဲ့ရတာပေါ့။ ရံဖန်ရံခါ ညစ်ညူးနေတဲ့စိတ်တွေ လန်းဆန်းသွားအောင်၊ တင်းကျပ်နေတဲ့အာရုံတွေ ပြေလျော့သွားအောင် သို့ကလို အသံဗလံလေးများနဲ့ ဖြော်ဖြေတင်ဆက်ပေးတဲ့ ပွဲလေးတွေကိုလည်း မလွတ်တမ်းပေါ့ခင်ဗျာ။ နိုင်ငံခြားအရက်လည်းရောင်းတဲ့ ပေါက်စီလင်မယားရဲ့ 'အချစ်ကြမ်းကြမ်း အာရမ်းရမ်း' ဇာတ်လမ်းတွဲလေးတွေပဲပေါ့။ စောင့်ကြည့်ရတဲ့ တာဟန်း (A) Group ရဲ့ အသည်းစွဲပဲလေ။ အဲ... ကြော်ငြာဝင်ပြီး နောက်တစ်ရက် နောက်တစ်ပိုင်း ထပ်ဆက်လာပါတယ်...။ ဘာတဲ့.... ရပ်ကွက်ထဲက မနေနိုင် မထိုင်နိုင် တစ်ဖက်သားကို အလွန်အင်မတန်မှ ကူညီချင်တဲ့ ဂရုဏာတော်ရှင်ကြီးရဲ့ ဦးဆောင်မှုနဲ့ ရပ်ကွက်ထဲက အိမ်ရှင်မများက နောက်တစ်နေ့မှာ ကတုံးမကို... အဲ ဟုတ်ပါဘူး... ပေါက်စီမကြီးကို အိမ်ပြန်ပို့ကြပါတယ်။ အဲဒီမှာ ညကပဲ လေတစ်လုံး မိုးတစ်လုံး ကြုံးဝါးထားတဲ့ ပေါက်ဖော်ကြီးဟာ လာရောက်ပို့ပေးသူ ကျေးဇူးရှင်များကို Sparkling၊ Orange အချိုရည်ပုလင်းတွေ ဖေါက်ပေးပြီး ၀မ်းသာအယ်လဲ ဧည့်ခံကျွေးမွေးတာကို အံ့သြဘနန်း ကြုံလိုက်ရပြန်တာမို့.... ပွဲကြည့်သူ ပရိသတ်များခမျာမှာလည်း မျက်စိ ပေကလပ် ပေကလပ်နဲ့ပဲ .... ။

မိန်းမအလွန်ချစ်သူ (၂)
၈၀ ခုနှစ်အစောပိုင်းကတည်းက ဖြစ်တည်လာခဲ့တဲ့ တာဟန်းရပ်ကွက်က တစ်ခုတည်းသော ပေါက်ဖော်စားသောက်ဆိုင်ကြီးရဲ့ လက်ရှိ Boss ကြီးဟာလည်းပဲ မခေဘူး ဆိုပဲဗျ။ တစ်ခါဗျာ... ကြုံတုန်း.. သူ့အတင်းလေး ဖေါက်လိုက်ဦးမယ်... ။ Senior ပေါက်ဖော်ကြီးဆုံးသွားတော့ Junior ဖြစ်တဲ့ အဆိုပါပုဂ္ဂိုလ်ကြီးဟာ ... မှတ်မှတ်ရရ ခရစ္စမတ်နှင့် New Year ကြားက Premier League ပွဲ ၂ ပွဲ ၃ ပွဲကို ညဥ့်နက်သည်အထိ U Hngaka၊ ဆရာဘကြူး၊ Pu Siama၊ ကိုကျော်မိုး (မှတ်မိသလောက်) တို့နဲ့အတူ မျက်စောင်းထိုးကအိမ်မှာ နှစ်သစ်ကူးကိုကြိုရင်း ကြည့်ဖြစ်ကြပါတယ် (အဲဒီညက ရှယ်မီးလာပါတယ်)။ ကြည့်ဆို ၀ါသနာပါလွန်းလို့တော့ မထင်လေနဲ့ ... ကြေးထပ်ထားတာ များနေလို့ ... အသည်းတထိတ်ထိတ် ရင်တဖိုဖိုနဲ့ ကြည့်ရတာပါ။ အားလပ်ချိန်ခဏနားတဲ့ကြားချိန်လေးမှာ နှစ်သစ်ကူးအကြို ကြက် ၂ ကောင်နဲ့ချက်ထားတဲ့ ကြက်သားဆန်ပြုတ်ကြီးကို ငရုတ်သီးစပ်စပ်ကလေးနဲ့ တပျော်တပါး ၀ိုင်းဝန်းပြီး ဖြိုကြတာပေါ့ခင်ဗျာ။

တကယ်ပြောချင်တာက.. အဲဒီမှာပါ။ ကိစ္စ..၀စ္စတွေပြီး အားလုံးသိမ်းပြီး အိပ်ယာဝင်တဲ့အချိန်ကျတော့မှ မောင်မင်းကြီးသားခင်မျာ ဗိုက်ကရစ်ပါလေရော။ သူ့ခင်ဗျာ Digene တွေ၊ လျှက်ဆားတွေနဲ့ အောင့်အီးပြီး တင်းခံနေပါသေးတယ်။ နောက်ဆုံးတော့ မရတော့ဘူးဗျ။ သူ့မဒမ်ကို အတင်းနှိုးပြီး လိုက်ပို့ခိုင်းရပါသော်ကော.. အိမ်သာကို....။ သူ့မိန်းမခင်ဗျာ တဗျစ်တောက်တောက်နဲ့ အိမ်သာရှေ့ငုတ်တုတ် ထိုင်စောင့်လိုက်ရပါတယ်.. ထိုတစ်ည၀ယ်ပေါ့။ အကြောင်းရင်းကို စစ်လိုက်တော့ Senior ကြီးဆုံးသွားတာ တစ်ပတ်သာသာပဲ ရှိသေးတော့ သရဲခြောက်မှာ ကြောက်လို့တဲ့ဗျား...။ သတ္တိကတော့ ရှယ်ပဲ။ သူက သူ့မိန်းမကို လုံးဝ လုံးဝမကြောက်ပါဘူး... အဲ.. သူ့မိန်းမကတော့ သူ့ကိုသာပြီးတော့တောင် မကြောက်သေးတယ်။ တစ်ခါလား... လင်မယားချင်း ချစ်တမ်းကစားရင်းက နည်းနည်း over ဖြစ်သွားတယ်ထင်တယ်... မိန်းမက တွေ့ကရာခဲနဲ့ ကောက်ထုပစ်တာ မျက်ခုံးကွဲပြီး Bethany ဆေးခန်းမှာ သုံးချက်တောင်ချုပ်လိုက်ရသေးတော့ ဆိုလားပဲ။ သူကတော့ပြောပါတယ်... 'ငါမရှောင်ရင် လွတ်တယ်' တဲ့။ တွတ်ပီထုံး နှလုံးမူနိုင်သေးတာပဲ တော်တော့တယ်။ .. သူလည်းပဲ တစ်ရက်ကလေး သူ့အိမ်မီးမလင်းလိုက်နဲ့ သူ့မဒမ်မျက်စောင်းကို မခံနိုင်ဘူး။ ချက်ချင်း ၂၄ နာရီလိုင်း ရတဲ့အိမ်တွေ ပိုက်စိတ်တိုက်လှည့်ပတ် ကြည့်တော့တာပဲ။ အားလုံးလည်း မလာဘူးဆိုမှ စိတ်ချလက်ချနဲ့ ပြန်လာပြီး မိန်းမကို တိကျသေချာတဲ့အဖြေကို ပေးရတာပါ။ တစ်အိမ်လောက်လင်းတာကို မြင်လာလို့ကတော့ တာဝန်ကျ Line Man ကို မတွေ့မချင်းလိုက်ရှာပြီး တဂျီဂျီနဲ့ လိုက်ဂျီကန်နေတော့တာပဲ။ မိန်းမငြိုငြင်တာ မခံနိုင်ဘူးလေ။ ပြောရင်းဆိုရင်း မီးဖက်ရောက်လာပြန်ပြီ။ ဒီဘူတာပဲ ဆိုက်ဆိုက်နေရတာပဲ။ (သူ့)မိန်းမကို ချစ်တဲ့အကြောင်း ပြောချင်တာပါ။

မိန်းမအလွန်ချစ်သူ (၃)
ကြုံကြိုက်တုန်း သတိရတာလေး ဖောက်သည်ချလိုက်ပါရစေဦးတော့... ။ တစ်လောလေးကပဲ အမေ့ကျေးဇူးကြောင့် မမြင်ဖူးဘဲ ဖူးစာဆုံလို့ မိန်းမရလိုက်တဲ့ အသိတစ်ယောက်အကြောင်းလေး...။
တစ်ရက်မှာ အကြောင်းကြောင်းကြောင့် နိုင်ငံခြားထွက် စီးပွားရှာဖို့ ရွာကနေ သနားကမားရုပ်ကလေးနဲ့ ချောချောလှလှ ကောင်းမလေးတစ်ယောက် ကလေးမြို့ကို ရောက်လာပါတယ်။ တည်းအိမ်မှာ သောင်တင်နေတုန်း ကောင်မလေးရဲ့ ယောက္ခမဖြစ်မယ့် အဆိုပါပုဂ္ဂိုလ်လေးရဲ့အမေကြီးက အဲဒီအိမ်ကို အလည်ရောက်လာပါရော။ ကောင်မလေးကိုတွေ့တော့ (တွေ့တော့ လို့သာပြောရတယ် အမေကြီးခမျာ နေ့ခင်းကြောင်တောင်မှာ လူလုံးတောင် သိပ်ကွဲချင်တာ မဟုတ်ဘူး) သဘောကျသွားတယ်။ တစ်ခါတည်း မစွံနိုင်တဲ့ ကိုယ့်အားကိုယ်ကိုးကြီး သားတော်မောင်အတွက် Intro ၀င်ပေးလိုက်တယ်။ သကောင့်သားကလည်း မမြင်ခင်မှာတော့ အင်တင်တင်ပေါ့။ တွေ့လည်းတွေ့ရော ချက်ချင်းကို တောင်းခိုင်းတော့တာပဲ။ အတိုချုံးလိုက်တော့ ထိမ်းမြားမင်္ဂလာပေါ့။ အဲလိုနဲ့ အိမ်ထောင်ကျပြီးတစ်နေ့မှာ ကိုယ်တို့ဆီ အသစ်ကျပ်ချွတ် အိမ်သူလေးနဲ့ ဆွေပြ မယားပြ လာရောက် အလည်အပတ်ပြုလာပါတယ်။ ဧည့်ခန်းမှာပဲထိုင်ပြီး အလာပ၊ သလာပတွေပြောရင်းပေါ့။ အဲဒီအချိန်မှာပဲ အတွင်းဖက်အခန်းမှာ (အိမ်မကြီးအခန်းနဲ့ တစ်ဆက်တည်း) ManU- Liverpool ပွဲကောင်းနေချိန်ဆိုတော့ ကာလသားများအပြည့်ပေါ့။ အဲဒီအချိန်ပေါ့ခင်ဗျာ... အဲဒီအချိန်လေးမှာပေါ့.. ကောင်မလေးက ဆီးသွားချင်ကြောင်း ကိုရွှေယောက်ျားဆီ သံတော်ဦးတင်ပါတယ်။ အဲဒီမှာ ကောင်လေးခဗျာ ဒုက္ခရောက်ရပြီ။ နောက်ဖေးသွားချင်ရင် အဲဒီအခန်းကို ဖြတ်သွားရမယ်။ အဲဒီလိုဖြတ်သွားရင် ကာလသားများက ၀ိုင်းပြီးကြည့်ကြတော့မယ်.... သူ့ရဲ့ မယား အချောအလှ မဟေသီလေးကို...။ အဲလိုတော့ အဖြစ်မခံနိုင်ဘူး။ တစ်မျိုးကြံစမ်း.... အိမ်ဘေးလမ်းကြားထဲမှာပဲ ကိစ္စရှင်းလိုက်ရင်ကော... မဖြစ်သေးဘူး... မတော်.. ဆိုင်ကယ်မီးရောင်ကြီးနဲ့ တန်းတိုးနေရင်။ အိမ်ဖက်ပဲ လှည့်ပြန်ရရင် ဆိုပြန်တော့ ရောက်တာဖြင့် စကားတောင် မစိုသေးဘူး။ အဲလို အပူလုံးကြွပြီးသကာလ နောက်ဆုံး မှောင်နဲ့မည်းမည်း အိမ်မကြီးကိုပတ်ပြီး သရဲမကြောက်၊ တစ္ဆေမကြောက် နောက်ဖေးအရောက် သူကိုယ်တိုင်ပဲ စောင့်ကြပ်လိုက်ပို့ပြီး ဖြေရှင်းလိုက်ပါတယ် ဆိုတာကိုပါ နောင်လာနောက်သားများ အတုယူလိုလျှင် ယူနိုင်စေရန်အလို့ငှါ ဝေမျှလိုက်ပါတယ်။ နောက်မှသိရတာ .. သူ့မဒမ်ကို အပြောလေးက
'မရဘူး... ယောက်ျားများတယ်' ဆိုပဲ။

ကျွန်တော်တို့ရပ်ကွက်ထဲက အဖြစ်ကလေးတွေပါ...။